rossinhol, el seu repaire
m’iraz ma dona vezer
e diguas li’l mieu afaire
et ill digua’t del siue ver,
e man sai, com l’estai,
mas de mi’ll sovenha,
que ges lai, per niull plai
ab si no’t retenha,
qu’ades no’m tornes retraire
son star e son capenter
qu’ieu non ai paren ni friare
don tant ho vueilla saber.”
ar s’en vai, l’auzels guai
dreit vas hon ill renha,
ab essai, ses asglai
tro qu’en trob l’ensenha.
quam ’auzeletz de bon aire
vi sa buetat aparer,
dous chant commencez a braire,
si com sol far contra’l ser
pueis se tai, que non brai
mas de liei s’engenha
co’l retrai, ses pantai
so qu’ill auzir denha.
« sel que’us es verais amaire
volc qu’ieu en vostre pder
vengues sai esser chantaire
per so que’us fos a plazer
e sabrai, quan verai
de vos l’entresenha
que’ill dirai, si ren sai
per qu’el lai s’en fenha
e si’l port que’s n’esclaire
gran gaug en devetz aver
qu’anc hom no nasquet de maire
tan de be’us puesca voler
le’m n’irai, e’m mourai
ab guac, on que’m venha...
no farai, quar non ai
dic qual plag en prenha.
